જામજોધપુરમાં બોર્ડની પરીક્ષા સમયે બહાર આવેલો કિસ્સો : પરીક્ષાચોરી કરતા પકડાયેલા વિદ્યાર્થી સામે પોલીસ ફરિયાદ નોંધાવાઈ, ઉપરાંત જાહેરનામા ભંગનો અલગથી કોપી કેસ પણ કરાયો
જામનગર, : જામનગર જિલ્લામાં લેવાઈ રહેલી ધોરણ 10 અને 12 ની બોર્ડની પરીક્ષા દરમિયાન ગઈકાલે વધુ એક કોપી કેસ નોંધાયો છે. ધોરણ ૧૨ નો એક વિદ્યાર્થી ગઈકાલે અંગ્રેજી વિષયના પેપર દરમિયાન ચાલુ પરીક્ષાખંડમાં મોબાઈલ ફોન લઈને પહોંચ્યો હોવાથી તેની સામે કોપી કેસ કરાયો છે. ઉપરાંત પોલીસ ફરિયાદ નોંધાવમાં આવી છે. પરીક્ષાખંડમાં એકાએક વિદ્યાર્થીના ખિસ્સામાંથી મોબાઇલ ફોન રણકતો થતાં મામલો સામે આવ્યો હતો, અને જામજોધપુર પોલીસ મથકમાં વિદ્યાર્થી સામે ગુનો નોંધાયો છે.
આ ફરિયાદ અંગેના બનાવની વિગત એવી છે કે, જામજોધપુરમાં આવેલી સરદાર વલ્લભભાઈ પટેલ હાઇસ્કુલમાં બ્લોક નંબર 24માં ગઈકાલે 21મી તારીખે ધોરણ 12ની અંગ્રેજી વિષયની પરીક્ષા લેવામાં આવી રહી હતી. જે પરીક્ષા ખંડમાં બપોરે 3.40 વાગ્યાના અરસામાં જામજોધપુર તાલુકાના જીણા વારી ગામના 12મા ધોરણના વિદ્યાર્થી સંદીપ ગોવિંદભાઈ પીપરોતર (ઉ. 18) કે જેના ખિસ્સામાં એકાએક મોબાઈલ ફોનની રિંગ વાગી હતી. જેથી અન્ય વિદ્યાર્થીઓ અને સુપરવાઈઝર વગેરે સ્તબ્ધ બની ગયા હતા.
આ વેળાએ પરીક્ષા ખંડમાં હાજર રહેલા સુપરવાઇઝર બિરજુભાઈ કાંતિભાઈ કનેરીયા કે જેમણે મોબાઈલ ફોન કબજે કરી લીધો હતો અને જામનગરની જિલ્લા શિક્ષણ અધિકારી કચેરીને તાત્કાલિક અસરથી જાણ કરી હતી અને સમગ્ર મામલો જામજોધપુર પોલીસમાં લઈ જવાયો હતો. જ્યાં પરીક્ષા ખંડના સુપરવાઈઝર બિરજુભાઈ કનેરિયાની ફરિયાદના આધારે વિદ્યાર્થી સંદીપ ગોવિંદભાઈ પીપરોતર સામે આઇપીસી કલમ 188 મુજબ ગુનો નોંધવામાં આવ્યો છે. જામજોધપુરના પોલીસ હેડ કોન્સ્ટેબલ આર.એચ. કરમુર દ્વારા વિદ્યાર્થી પાસેથી મોબાઈલ ફોન કબજે કરી લીધો છે, જ્યારે વિદ્યાર્થીને અટકાયતમાં લીધા પછી તેને તુરત જ જામીન પર મુક્ત કરી દેવામાં આવ્યો છે. ચાલુ પરીક્ષા દરમિયાન જામનગર જિલ્લામાં બીજો કોપી કેસ નોંધાયો છે. વિદ્યાર્થી કે જે વધારાનું પેપર આપી રહ્યો હતો, અને પોતાનાથી ભૂલથી મોબાઈલ ફોન પરીક્ષા ખંડમાં રહી ગયો હોવાનું જણાવ્યું હતું.
https://ift.tt/iL2ChmM
0 ટિપ્પણીઓ